Þemaheftið „Heil og sæl“ fjallar um heilbrigði og heilbrigða lífshætti. Markmið þess er að hvetja unglinga til að vera meðvitaða um gildi heilbrigðra lífshátta og sýna hvernig eigin ákvarðanir geta haft afgerandi áhrif á líf þeirra. Jafnframt leggur heftið áherslu á að nemendur sjái hvernig grunnþættir menntunar mynda heild og starfa sem vegvísar um líf og starf í nútíma samfélagi. Þó heilbrigði sé í forgrunni tengist efnið öllum grunnþáttum menntunar og námsgreinum, svo sem lífsleikni, heimilisfræði, náttúrufræði og íþróttum. Við gerð heftisins var lögð áhersla á að tengja umfjöllunina fyrri þekkingu nemenda á heilbrigðum lífsháttum, þar á meðal hollu mataræði, líkamsstarfsemi og mikilvægi hreyfingar.